我點樣搵到呢隻野架呢， 其實係咁既。。。。。。
之前我係間細細既美容院做開facial， 佢有一隻叫 BB Skin 既療程，其實佢係普通facial而中間會搽d叫BB Skin 既藥水，每次做完第二曰，d黑頭粉刺就會慢慢自然出黎，而毛孔又會愈黎愈細，連d凹凸洞都會慢慢平番，真係好勁，可惜佢一定要我每個星期都做，而間野又遠（係屯門，屯門既朋友歡迎問我拎地址）。我唔可以個個weekend都入去，家住九龍東架！我就好想搵到佢個支藥水，睇下可唔可以自己係屋企自己搽啦。當然，我係搵唔到支野，因為我係無見過支野咩樣，亦唔知個支野既真名架 =-= 搵唔到，無法啦，唯有睇下有無代替品，搵下搵下，就搵到呢個面膜粉啦。 雖然網上面既都係打手既介紹文 （本小姐做邊行，我一眼就知係唔係廣告啦，一定呃唔到我），但係因為無乜其他代替品係接近隻藥水，人一世物一世，就去買黎試下啦。
呢隻粉得雅詩先有， 長期話自己做緊promotion，$280 一盒，我已經用緊第二盒，第一盒用左大概8個月，平均一星期用1-2次。
用左8個月，即係有32個星期，一個星期用2次（頭幾個月我keep住一個星期用3次架），即係用到64次度，平均一次$4.4 ， 都算平啦。
有人會話要自己開粉好煩，我起初都覺得係，不過用落又無想像咁麻煩。 加上"世界上無。。。"，大家都知我想講咩啦 XDDD
個盒入面包埋隻匙仔，我通常會用2-3匙呢個份量（等我放大張相俾大家睇得清楚d）
至於用咩開呢。。。。。
我最鍾意係用plain yogurt，敷完皮膚又白又滑。
平時懶d既話，我會用toner。 可能你會話，下，咁個mask未貴左好多，唔好意思，我平時用既toner係莎莎個d買，$50幾蚊好大支既曰本toner黎。 所以我成曰好盡情咁用，而效果又幾好。
有時除左加toner， 我就會因應個排皮膚既需要加少少精華素，你想美白就加有美白成份既，想保濕，我就會加少少B5 gel 或者係玻尿酸 精華咁。
呢個亦係我鍾意佢既地方，有邊隻mask可以你想有咩效果就做咩架，出面隻隻牌子都要唔同效果買唔同product架嘛，真係買都買窮人。
開好左，搽上面，等15分鐘，洗面，皮膚乾淨又舒服。再敷其他mask都吸收d架。 我介紹過俾其他朋友，佢地都一試就愛上啦
不過今曰未有影其他相，太心急想同大家分享左先，過幾曰用佢既時候再影相俾大家睇 =）
講住咁多先，晚安！
